जळगाव -लाईव्ह ट्रेंडस न्यूज प्रतिनिधी । पाणी फाउंडेशनच्या वतीने आयोजित ‘फार्मर कप’ निवासी प्रशिक्षणासाठी जळगाव तालुक्यातील महिला व पुरुष शेतकऱ्यांची तुकडी आज बुलडाणा जिल्ह्यातील जळगाव जामोद येथील के.व्ही.के. सेंटरकडे रवाना झाली. जिल्हाधिकारी रोहन घुगे यांनी या बसला हिरवा झेंडा दाखवून शेतकऱ्यांना शुभेच्छा दिल्या.
प्रशिक्षणाचा मुख्य उद्देश कृषी विभाग आणि उमेद अभियानांतर्गत आयोजित या प्रशिक्षणातून शेतकऱ्यांना जलसंधारण, शाश्वत शेती पद्धती आणि सर्वांगीण ग्रामविकासाचे तंत्र शिकवले जाणार आहे. आधुनिक शेतीची कास धरून गावाचा कायापालट करणे हा या उपक्रमाचा मूळ हेतू आहे.
प्रशासकीय उपस्थिती यावेळी जिल्हाधिकारी कार्यालयाच्या प्रांगणात आयोजित कार्यक्रमात डीआरडीएचे प्रकल्प संचालक राजू लोखंडे, जिल्हा कृषी अधीक्षक कुरबान तडवी, उपविभागीय कृषी अधिकारी श्रीमती देसले, कृषी अधिकारी स्नेहल थेऊरकर, बीडीओ चंद्रकांत बोडरे आणि उमेदचे तालुका व्यवस्थापक देवेंद्र सुर्यवंशी उपस्थित होते. तसेच पाणी फाउंडेशनचे विभागीय समन्वयक प्रल्हाद आरसुळे, सुहास मोहिते, प्रियंका बैसाणे व तेजस निकुंभ यांनी प्रशिक्षणाचे नियोजन केले.
जिल्हाधिकाऱ्यांचे आवाहन शेतकऱ्यांना मार्गदर्शन करताना जिल्हाधिकारी रोहन घुगे म्हणाले की, फार्मर कप प्रशिक्षणाच्या माध्यमातून मिळालेल्या ज्ञानाचा वापर करून शेतकऱ्यांनी जलसंवर्धनाचे काम करावे. शाश्वत शेतीचा अवलंब करून जिल्ह्याच्या विकासात सक्रिय सहभाग नोंदवण्याचे आवाहनही त्यांनी यावेळी केले.
