जळगाव-लाईव्ह ट्रेंड्स न्यूज प्रतिनिधी । जागतिक कर्करोग दिनाच्या पार्श्वभूमीवर समाजात आरोग्यविषयक जागरूकता वाढविण्याच्या उद्देशाने गोदावरी कॉलेज ऑफ नर्सिंग, जळगाव येथील विद्यार्थ्यांनी चांडक कॅन्सर हॉस्पिटलमध्ये विशेष जनजागृती कार्यक्रम आयोजित केला. कम्युनिटी हेल्थ नर्सिंग विभागाच्या पुढाकारातून झालेल्या या उपक्रमात रुग्ण, नातेवाईक आणि नागरिकांना कर्करोगाविषयी महत्त्वपूर्ण माहिती देण्यात आली.
कार्यक्रमादरम्यान नर्सिंग विद्यार्थ्यांनी कर्करोगाची लक्षणे, त्याचे लवकर निदान का आवश्यक आहे, तसेच प्रतिबंधात्मक उपाययोजना याविषयी सविस्तर आरोग्य शिक्षण दिले. वेळेवर तपासणी आणि उपचार घेतल्यास कर्करोगावर प्रभावीपणे मात करता येते, हा संदेश देत विद्यार्थ्यांनी सकारात्मक आरोग्यवर्तनाचे महत्त्व अधोरेखित केले. या संवादात्मक सत्रांमुळे रुग्णांमध्ये भीती कमी होऊन जागरूकता वाढीस लागल्याचे दिसून आले.
यावेळी चांडक कॅन्सर हॉस्पिटलचे डॉ. निलेश चांडक आणि डॉ. सागर व्यास यांनी विद्यार्थ्यांना कर्करोगाचे विविध प्रकार, अद्ययावत उपचार पद्धती आणि केमोथेरपी प्रक्रियेबाबत सखोल मार्गदर्शन केले. त्यांच्या मार्गदर्शनामुळे विद्यार्थ्यांच्या क्लिनिकल ज्ञानात भर पडली असून व्यावसायिक दृष्टिकोन अधिक बळकट झाला आहे. वैद्यकीय तज्ज्ञांशी झालेल्या संवादामुळे विद्यार्थ्यांना प्रत्यक्ष रुग्णसेवेतील बारकावे समजण्यास मदत झाली.
हा कार्यक्रम रुग्णांसाठी माहितीपूर्ण ठरला, तर विद्यार्थ्यांसाठी व्यावहारिक शिक्षणाचा महत्त्वाचा भाग ठरला. समाजात कर्करोगासारख्या गंभीर आजाराबद्दल जागरूकता वाढविणे आणि प्रतिबंधात्मक आरोग्य संस्कृती रुजविणे, या दृष्टीने गोदावरी नर्सिंग महाविद्यालयाचा हा उपक्रम मोलाचा ठरला आहे.
