सावदा-लाईव्ह ट्रेंड्स न्यूज प्रतिनिधी । शहरातील विश्रामगृह ते पिंपरुड रिंगरोड या मार्गावर नागरिकांच्या सुरक्षेसाठी पथदिवे व गतिरोधक बसविण्याची मागणी नगरसेविका कु. सिमरन राजेश वानखेडे यांनी नगरपरिषदेकडे निवेदनाद्वारे केली आहे. या मार्गावर सकाळी व सायंकाळी मोठ्या संख्येने नागरिक फिरण्यासाठी येत असल्यामुळे अपघाताचा धोका वाढत असल्याची बाब त्यांनी नगरपरिषदेच्या निदर्शनास आणून दिली आहे.
नगरसेविका सिमरन वानखेडे यांनी दिलेल्या निवेदनात म्हटले आहे की, सावदा शहरातील विश्रामगृह ते रिंगरोड हा मार्ग नव्याने तयार झालेला असून तो रहिवासी भागालगत असल्याने नागरिकांसाठी वॉकिंगसाठी अत्यंत उपयुक्त ठरत आहे. दररोज सकाळी आणि सायंकाळी मोठ्या प्रमाणावर नागरिक येथे फिरण्यासाठी येत असतात. विशेषतः महिला व तरुणींची संख्या लक्षणीय असल्याचेही निवेदनात नमूद करण्यात आले आहे. मात्र या मार्गावर पुरेशा पथदिव्यांचा अभाव असल्यामुळे संध्याकाळच्या वेळी अंधार पसरतो आणि त्यामुळे नागरिकांना असुरक्षिततेचा सामना करावा लागत आहे.
स्वर्गीय खासदार हरिभाऊ जावळे यांच्या नावाने ओळखल्या जाणाऱ्या आमोदा–पाल राज्यमार्गावर लहान-मोठ्या तसेच अवजड वाहनांची मोठ्या प्रमाणात वर्दळ असते. काही दुचाकीस्वार भरधाव वेगाने वाहन चालवत असल्यामुळे या मार्गावर अपघात होण्याची शक्यता वाढली आहे. त्यामुळे सकाळ व सायंकाळच्या वेळी फिरण्यासाठी येणाऱ्या नागरिकांना, विशेषतः महिला व तरुणींना, मोठा धोका पत्करावा लागत असल्याची चिंता नगरसेविका वानखेडे यांनी व्यक्त केली आहे.
तसेच विश्रामगृह चौकात तीन रस्ते एकत्र येत असल्यामुळे वाहतूक अधिक वाढते. मात्र येथे गतिरोधक नसल्यामुळे वाहनांचा वेग नियंत्रणात राहत नाही आणि त्यामुळे वारंवार अपघात घडत असल्याचेही निवेदनात नमूद करण्यात आले आहे. वाहनचालकांना वेग कमी करण्याचा इशारा मिळावा तसेच संभाव्य अपघात टाळण्यासाठी या चौकात तातडीने गतिरोधक बसविण्याची आवश्यकता असल्याचे त्यांनी अधोरेखित केले आहे.
या रस्त्याची जबाबदारी सार्वजनिक बांधकाम विभागाच्या अखत्यारीत येत असली तरी अनेक वेळा पाठपुरावा करूनही अद्याप ठोस कार्यवाही झालेली नसल्याचेही निवेदनात नमूद करण्यात आले आहे. त्यामुळे नगरपरिषदेने पुढाकार घेऊन या मार्गावर पथदिवे उभारावेत आणि आवश्यक त्या ठिकाणी गतिरोधक बसवावेत, जेणेकरून नागरिकांची सुरक्षितता सुनिश्चित होईल व संभाव्य अपघात टाळता येतील, अशी मागणी नगरसेविका सिमरन वानखेडे यांनी केली आहे.
या मागणीमुळे सावदा शहरातील वाहतूक सुरक्षेचा प्रश्न पुन्हा ऐरणीवर आला असून प्रशासनाने याकडे गांभीर्याने लक्ष देण्याची गरज व्यक्त केली जात आहे.
