जळगाव प्रतिनिधी । शहरातील विकासकामांसाठी आलेल्या ४२ कोटींच्या कामाची वर्क ऑर्डर मक्तेदाराला देण्यात आली असून मनपाने आपल्या हिश्शाची रक्कम देखील स्वतंत्र खात्यात वर्ग केली आहे. दरम्यान, संपूर्ण कामे करण्यासाठी सार्वजनिक बांधकाम विभाग व जळगाव महानगरपालिकेचे संयुक्त खाते उघडणे आवश्यक आहे.
मनपाने संयुक्त खात्यात निधी वर्ग करण्यासाठी आवश्यक पत्र सार्वजनिक बांधकाम विभागाने द्यावे यासाठी महापौर भारती सोनवणे यांनी सार्वजनिक बांधकाम विभागाच्या अधिकाऱ्यांची भेट घेतली होती. महापौरांच्या भेटीनंतर सार्वजनिक विभागाने मनपाला शुक्रवारी याबाबत पत्र दिले आहे.
जळगाव शहरातील विकासकामांसाठी सुवर्ण जयंती नगरोत्थान योजनेअंतर्गत ४२ कोटींची कामे मंजूर करण्यात आली होती. काही तांत्रिक कारणास्तव कामांना स्थगिती देण्यात आली होती. गेल्या आठवड्यात सर्व कामांची स्थगिती हटवून मक्तेदाराला कार्यादेश देण्यात आले आहेत. कामासाठी सार्वजनिक बांधकाम विभाग आणि जळगाव मनपाचे स्वतंत्र संयुक्त बँक खाते उघडणे आवश्यक आहे. मनपाच्या हिश्शाचा निधी संयुक्तिक खात्यात वर्ग करण्यासाठी सार्वजनिक बांधकाम विभागाने मनपा प्रशासनाला पत्र देणे आवश्यक आहे. दोन दिवसांपूर्वी सार्वजनिक बांधकाम विभागाच्या अधिकाऱ्यांची भेट घेत महापौर भारती सोनवणे व नगरसेवकांनी त्यांना विनंती केली.
महापौर सौ.भारती सोनवणे व शिष्टमंडळाने घेतलेल्या भेटीनंतर सार्वजनिक बांधकाम विभागाने मनपा आयुक्तांना याबाबत पत्र पाठविले असून शासन निर्णयानुसार निधी उपलब्ध करून देण्याचे सुचविले आहे. मनपकडून पुढील कार्यवाही लवकरात लवकर करण्यात येणार असून त्यानंतर कामाला प्रत्यक्षात सुरुवात होणार असल्याची माहिती महापौरांनी दिली आहे.
