जळगाव प्रतिनिधी । तालुक्यातील विटनेर येथे दोन तरुणांचा पाझर तलावात बुडून मृत्यू झाल्याची घटना आज सायंकाळी 5.30 वाजेच्या सुमारास घडली असून एमआयडीसी पोलीस ठाण्यात अकस्मात मृत्यूची नोंद करण्यात आली.
याबाबत माहिती अशी की, तालुक्यातील विटनेर येथील शेतकरी ज्ञानेश्वर दगडू ढमाले (वय 28) हे शेतामध्ये काम केल्यानंतर फवारणी झाल्यावर हात पाय धुण्यासाठी पाझर तलावांजवळ गेले असताना तलावात शेतकरी योगेश ज्ञानेश्वर वराडे (वय-19) हा पाण्यात पडून बुडत असताना दिसला. योगेशला वाचवण्यासाठी शेतकरी ज्ञानेश्वर हा गेला असता दोन्ही शेतकरी हे पाझर तलावात बुडून मृत्यू झाला. घटनेची माहिती मिळताच एमआयडीसी पोलिस स्टेशनचे पोलीस कर्मचारी शिवदास चौधरी, सचिन देशमुख व विटनेरचे पोलीस पाटील साहेबराव धुमाळ यांनी गावकऱ्यांच्या मदतीने बुडालेल्या लोकांची मृतदेह बाहेर काढले. दोन्ही मयत तरुणांचा मृतदेह जिल्हा शासकीय वैद्यकीय महाविद्यालयात शवविच्छेदन करण्यासाठी आणण्यात आला आहे. याप्रकरणी एमआयडीसी पोलिसांत अकस्मात मृत्यूची नोंद करण्यात आली आहे.
