जळगाव-लाईव्ह ट्रेंडस न्यूज प्रतिनिधी । जळगाव शहरातील तांबापुरा परिसरातील खदानीजवळ लोखंडी तलवार घेऊन दहशत माजविणाऱ्या एका तरुणाला एमआयडीसी पोलिसांनी बुधवार १२ जून रोजी दुपारी १२.३० वाजता कारवाई करत अटक केली आहे. याप्रकरणी सायंकाळी ५ वाजता एमआयडीसी पोलिसात गुन्हा दाखल करण्यात आला. फैजल शेख कादिर वय-१८, रा. मास्टर कॉलनी जळगाव असे अटक केलेल्या संशयित आरोपीचे नाव आहे.
जळगाव शहरातील तांबपुरा परिसरात असलेल्या खदानीजवळ फैजल शेख कादीर हा हातात तलवार घेऊन दहशत माजवित असल्याची गोपनिय माहिती एमआयडीसी पोलीस ठाण्याचे पोलीस निरीक्षक बबन आव्हाड यांना मिळाली. त्यानुसार एमआयडीसी पोलीस ठाण्याचे पोलीस उपनिरीक्षक दत्तात्रय पोटे, सहाय्यक फौजदार अतुल वंजारी, पोलीस नाईक विकास सातदिवे, सचिन पाटील, ललित नारखेडे, चंद्रकांत पाटील, गणेश ठाकरे, सिद्धेश्वर टापकर यांनी बुधवारी १२ जून रोजी दुपारी १२ वाजता कारवाई करत संशयित आरोपी फैजल शेख कादिर याला अटक केली. त्याच्याकडून लोखंडी तलवार हस्तगत केली आहे. याप्रकरणी पोलीस कॉन्स्टेबल ललित नारखेडे यांनी दिलेल्या फिर्यादीवरून एमआयडीसी पोलीस ठाण्यात गुन्हा दाखल करण्यात आला आहे. या घटनेचा पुढील तपास पोलीस नाईक विकास सातदिवे हे करीत आहे.