जळगाव (प्रतिनिधी) कवयित्री बहिणाबाई चौधरी उत्तर महाराष्ट्र विद्यापीठाशी संलग्नित महाविद्यालये अथवा विद्यापीठातील प्रशाळांमधील जे विद्यार्थी क्रीडा स्पर्धेतील सहभागामुळे ऑक्टोबर/नोव्हेंबर २०१८ च्या परीक्षेतील काही विषयांना उपस्थित राहू शकले नव्हते, अशा विद्यार्थ्यांची परीक्षा ३ जुलैपासून घेण्यात येणार आहे.
नवीन विद्यापीठ कायदयात परीक्षांच्या वेळापत्रका दरम्यान आंतरविद्यापीठीय किंवा राष्ट्रीय अथवा आंतरराष्ट्रीय क्रीडा स्पर्धामध्ये / कार्यक्रमांमध्ये सहभागी होणाऱ्या विद्यार्थ्यांच्या परीक्षेसाठी पर्यायी व्यवस्था करण्याचे सुचित करण्यात आले आहे. विद्यापीठाच्या व्यवस्थापन परिषदेने ४ जानेवारीच्या बैठकीत अशा विद्यार्थ्यांची पुन्हा परीक्षा घेण्याचा ठराव संमत केला. त्यानुसार या विद्यार्थ्यांची परीक्षा ३ जुलैपासून घेतली जाणार आहे. ज्या विद्यार्थ्यांची नावे क्रीडा स्पर्धा / कार्यक्रमांसाठी संचालक, क्रीडा व शारीरिक शिक्षण मंडळ यांचेकडे जमा करण्यात आली होती, त्यांच्यासाठीच ही परीक्षा घेण्यात येणार असून विद्यापीठाच्या संकेतस्थळावर परीक्षेचे वेळापत्रक व अनुषंगिक माहिती उपलब्ध करुन देण्यात आली आहे, अशी माहिती परीक्षा व मूल्यमापन मंडळाचे संचालक बी.पी.पाटील यांनी दिली आहे.