भुसावळ-लाईव्ह ट्रेंडस न्यूज प्रतिनिधी । अवैधरित्या वाळू वाहतूक करणाऱ्या ट्रॅक्टरवर कारवाई करतांना महसूल पथकाशी हुज्जत घालत धक्काबुक्की करून सरकारी कामात अडथळा निर्माण केल्याची घटना वराडसीम-बेलव्हाय रस्त्यावर बुधवारी घडली. याप्रकरणी मंडळाधिकारी यांनी दिलेल्या फिर्यादीवरून भुसावळ तालुका पोलीस ठाण्यात ट्रॅक्टर चालक व मालक यांच्यावर गुन्हा दाखल करण्यात आला आहे.
भुसावळ तालुक्यातील वराडसीम ते बेलव्हाय रस्त्यावरून अवैधरित्या वाळूची वाहतूक होत असल्याची गोपनिय माहिती मंडळाधिकारी योगीता पाटील यांना मिळाली. त्यानुसार त्यांनी आपल्या पथकासह बुधवारी २३ ऑगस्ट रोजी दुपारी साडेबारा वाजता कारवाई करत वाळूने भरलेले ट्रॅक्टर पकडले. त्यावेळी चालक अविनाश चंद्राकंत पवार रा. बेलव्हाय ता. भुसावळ याला वाळू वाहतूकीचा परवाना विचारला. त्यावर त्याने उडवाउडविची उत्तरे दिली. ट्रॅक्टरवर कारवाई करत असतांना ट्रॅक्टर मालक किरण शेषराव शिंदे हा दुचाकीने तिथे आला. त्यावेळी मंडळाधिकारी योगिता पाटील यांच्यासह पथकाशी हुज्जत घालून त्यांना ढकलून दिले. त्यानंतर तुम्हाला पाहून घेईल अशी धमकी देत शासकीय कामात अडथळा निर्माण करून वाळूने भरलेले ट्रॅक्टर घेवून पसार झाले. याप्रकरणी मंडळाधिकारी योगीता पाटील यांनी शुक्रवारी २५ ऑगस्ट रोजी पोलीसात तक्रार दिली. त्यांनी दिलेल्या तक्रारीवरून ट्रॅक्टर चालक अविनाश चंद्रकांत पवार आणि मालक किरण शेषराव शिंदे या दोघांवर भुसावळ तालुका पोलीस ठाण्यात गुन्हा दाखल करण्यात आला आहे. पुढील तपास परिविक्षाधिन पोलीस उपनिरीक्षक पुजा अंधारे करीत आहे.