भुसावळ, प्रतिनिधी | येथील प्रभाग क्रमांक १८ मधील गंगाराम प्लॉट, पंचशील नगर, कोलते गल्ली, गौतम नगर आदी भागांमधील शौचालयाची दुर्दशा झाली असून त्यांची तात्काळ दुरूस्ती करण्यात यावी अशी मागणी नगरसेविका मीनाक्षी धांडे व सामाजिक कार्यकर्ते तथा राष्ट्रवादी काँग्रेसचे शहराध्यक्ष नितीन धांडे यांनी मुख्याधिकारी करुणा डहाळे यांच्याकडे एका निवेदनाद्वारे केली आहे.
या निवेदनात म्‍हटले आहे की, या भागातील शौचालयांमध्ये वॉश बेसिंग, टाइल्स, दरवाजे, पाणी कुंड, दिवे, रंग, नळ कनेक्शन आदींची दुरुस्‍ती, ज्येष्ठ नागरिकांना बसण्यासाठी पश्‍चिमात्‍य पद्धतीची शौचालये तत्काळ तयार करण्यात यावी, प्रभागातील संतोषी माता मंदिराजवळ ज्येष्ठ नागरिकांना बसण्यासाठी बाकांची व्यवस्था करण्यात यावी, प्रभागातील पथदिवे बऱ्याच दिवसांपासून बंद आहेत, त्यामुळे नागरिकांना मोठ्या अडचणींचा सामना करावा लागत आहे. या सर्व समस्या तत्काळ सोडवण्यात याव्‍यात, अशा मागण्या या निवेदनातून करण्यात आल्या आहेत.