मुंबई वृत्तसंस्था । मुख्यमंत्री उद्धव ठाकरे यांच्या ‘मातोश्री’ या खासगी निवासस्थानी धमकीचा निनावी फोन कॉल आल्याने खळबळ उडाली आहे. कॉल करणाऱ्या व्यक्तीने आपण दाऊद गँगचा हस्तक असल्याचा दावा करत मातोश्री निवासस्थान बॉम्बने उडवून देण्याची तसेच मुख्यमंत्री ठाकरे यांना जीवे मारण्याची धमकी दिली असून या कॉलनंतर मुंबई पोलिसांनी तातडीने मुख्यमंत्र्यांच्या निवासस्थानाच्या सुरक्षेत वाढ केली आहे.
वांद्रे कलानगर येथे मातोश्री निवासस्थान असून मातोश्रीतील लँडलाइनवर धमकीचे तीन ते चार कॉल आले आहेत. समोरच्या व्यक्तीने आपण दाऊद इब्राहिमचा हस्तक असल्याचा दावा करत मुख्यमंत्र्यांचे निवासस्थान बॉम्बने उडवण्याची धमकी दिली. हे कॉल दुबईतून आले होते, अशी माहिती मिळत आहे. आज सकाळी ११ वाजताच्या सुमारास हे धमकीचे कॉल आले. मातोश्री निवासस्थानी ड्युटीवर असलेल्या पोलीस ऑपरेटरने हे कॉल घेतले, असेही सांगण्यात आले. धमकीचे फोन आल्यानंतर त्याबाबत तातडीने पोलिसांना कळवण्यात आले असून पोलिसांनी गंभीर दखल घेत मातोश्रीच्या सुरक्षा व्यवस्थेत वाढ केली आहे. मातोश्री निवासस्थानाला विशेष सुरक्षा पुरवण्यात आली आहे.
परिवहन मंत्री अॅड. अनिल परब यांनी याबाबत शिवसेनेच्या वतीने अधिकृत माहिती दिली आहे. मातोश्रीच्या लँडलाइन फोनवर निनावी कॉल आला होता व या व्यक्तीने आपण दाऊद गँगकडून बोलतोय असे सांगितले, या माहितीला परब यांनी दुजोरा दिला. मातोश्री बॉम्बने उडवून देण्याची धमकी देण्यात आलेली नाही. समोरच्या व्यक्तीने त्याला मुख्यमंत्र्यांशी बोलायचे आहे, असे सांगितल्याचे परब यांनी नमूद केले. या निनावी कॉलबद्दल पोलिसांना कळवण्यात आले असून हा फोन कुणी केला होता व कशासाठी केला होता, तो दाऊद गँगचा हस्तक आहे का, याचा तपास पोलीस करतील, असे परब म्हणाले. मातोश्रीला धमकी देण्याची कुणाची आजवर हिंमत झाली नाही आणि अशी कुणी धमकी दिलीच तर तो पोलिसांच्या कचाट्यातून सुटणार नाही, असेही परब यांनी बजावले.
गृहराज्यमंत्री शंभूराज देसाई यांनीही या प्रकाराची गंभीर दखल घेतली आहे. मातोश्री निवासस्थान हे शिवसैनिकांसाठी श्रद्धास्थान आहे आणि या निवासस्थानाकडे कुणी वाकड्या नजरेने पाहिल्यास ते खपवून घेतले जाणार नाही, असे मी एक शिवसैनिक म्हणून बजावून सांगतो, असे देसाई म्हणाले. या कॉलचा लवकरच छडा लावला जाईल व कॉल करणाऱ्याला धडा शिकवला जाईल, असेही त्यांनी नमूद केले.