शाहजहांपूर (वृत्तसंस्था) माजी केंद्रीय मंत्री व भाजप नेते स्वामी चिन्मयानंद यांना विद्यार्थिनीवर बलात्कार केल्याच्या आरोपाखाली अटक करण्यात आली आहे. या घटनेमुळे उत्तर प्रदेशात प्रचंड खळबळ उडाली आहे. दरम्यान, चिन्मयानंदला अटक न झाल्यास आत्महत्या करण्याची धमकी पीडित मुलीने दिली होती. त्यामुळे हे प्रकरण चिघळणार असे दिसताच चक्रे फिरली आणि अखरे अटकेची कारवाई झाली.
शहाजहांपूर येथील आश्रमातून विशेष तपास पथकाने (एसआयटी) आज सकाळी चिन्मयानंद यांना ताब्यात घेतले. शहाजहांपूर येथे चिन्मयानंद यांचे लॉ कॉलेज आहे. याच कॉलेजातील एका विद्यार्थिनीवर बलात्कार केल्याचा व तिचे लैंगिक शोषण केल्याचा आरोप चिन्मयानंद यांच्यावर आहे. चिन्मयानंद निर्दोष असल्याचे सांगत त्यांचे पाठीराखे रस्त्यावर उतरले होते. मात्र, पीडित विद्यार्थिनीनेही माघार न घेता या संदर्भातले अनेक व्हिडिओ जाहीर केले होते. त्यानंतर चिन्मयानंद यांना अटक करण्यासाठी योगी सरकारवर दबाव वाढला होता.