मुंबई (वृत्तसंस्था) महाराष्ट्र अंधश्रद्धा निर्मूलन समितीचे कार्याध्यक्ष डॉ. नरेंद्र दाभोलकर यांच्यावर मी व सचिन अंदुरेने गोळीबार केला,अशी कबुली अटकेतील शरद कळसकरने न्यायवैद्यकीय चाचणी दिली आहे. सीबीआयने केलेल्या न्यायवैद्यकीय चाचणीत कळसकरने दाभोलकरांची हत्या केल्याची कबुली दिली आहे.
मागच्यावर्षी जून महिन्यात मी पुनाळेकर यांची भेट घेतली होती. त्यावेळी त्यांनी मला दाभोलकर यांच्या हत्येसाठी वापरलेली शस्त्र नष्ट करण्याचा सल्ला दिला होता, अशी कबुली कळसकरने न्यायवैद्यकीय चाचणीत दिला आहे. फेब्रुवारी २०१९ मध्ये सीबीआयकडून विशेष न्यायालयात दाखल करण्यात आलेल्या दोषारोपपत्रासोबत न्यायवैद्यकीय चाचणीचा अहवाल जोडण्यात आला होता. सीबीआयचे विशेष सरकारी वकील अॅड. प्रकाश सुर्यवंशी यांनी मंगळवारी या अहवालाचा आधार घेऊन बाजू मांडली. शरद कळसकरने न्यायवैद्यकीय चाचणीत त्याचे वकील संजीव पुनाळेकर यांचे सुद्धा नाव घेतले आहे. डॉ. नरेंद्र दाभोलकर हत्या प्रकरणात वकील संजीव पुनाळेकर सुद्धा अटकेत आहेत. सीबीआयने २५ मे रोजी संजीव पुनाळेकर आणि विक्रम भावे यांना दाभोलकर हत्या प्रकरणात अटक केली. दरम्यान, सीबीआयकडून या संबंधीचा अहवाल मंगळवारी विशेष न्यायालयात सादर करण्यात आला.