जळगाव लाईव्ह ट्रेंड्स न्यूज प्रतिनिधी । जळगाव शहरातील फुले मार्केट परिसरात खरेदीसाठी आलेल्या एका व्यक्तीच्या कापडी पिशवीतून साडेचार हजार रुपयांची रोकड चोरून नेल्याची घटना शुक्रवारी १० नोव्हेंबर रोजी दुपारी १ वाजेच्या सुमारास घडली आहे. याप्रकरणी जळगाव शहर पोलीस ठाण्यात अज्ञात चोरट्यांविरोधात गुन्हा दाखल करण्यात आला आहे.
जळगाव शहर पोलिसांनी दिलेली माहिती अशी की, सुवर्णसिंग भरतसिंग राजपूत (वय-५१, रा. गणेश कॉलनी) हे १० नोव्हेंबर रोजी दुपारी १ वाजता फुले मार्केट परिसरात गेले होते. त्यांनी सोबतच्या कापडी पिशवीत रोख रक्कम ठेवली होती. त्यावेळी अज्ञात चोरट्याने पिशवीतील ४ हजार ५०० रुपये चोरून नेले. ही बाब लक्षात आल्यानंतर त्यांनी शहर पोलिस ठाण्यात फिर्याद दिली. त्यावरून अज्ञात चोरट्याविरुद्ध गुन्हा दाखल करण्यात आला आहे. पुढील तपास पोहेकॉ राजकुमार चव्हाण करीत आहेत.