नवी दिल्ली प्रतिनिधी । दिल्ली विधानसभेचे अध्यक्ष रामनिवास गोयल यांना एका बिल्डरच्या घरात बळजबरीने घुसण्याच्या आरोपाखाली दिल्लीतील एका न्यायालयाने त्यांना ६ महिन्यांचा तुरूंगवासाची शिक्षा ठोठावला आहे. याप्रकरणी न्यायालयाने आज गोयल यांना दोषी ठरवल्यानंतही ही शिक्षा ठोठावण्यात आली.
ही घटना ६ फेब्रुवारी २०१५ रोजी रात्रीच्या वेळी घडली होती. रामनिवास गोयल यांच्या विरोधातील या प्रकरणात कोणत्याही प्रकारचा संशय उरला नसल्याचा निर्वाळा अतिरिक्त मुख्य महानगर दंडाधिकारी समर विशाल यांनी दिला होता. यावेळी याप्रकरणी त्यांनी इतर ४ जणांना दोषी ठरवले होते. रामनिवास गोयल, सुमित गोयल, हितेश खन्ना, अतुल गुप्ता आणि बलबीर सिंह यांना घरात बळजबरीने घुसल्याप्रकरणी कलम ४४८ अंतर्गत दोषी ठरवण्यात आले.
काय आहे प्रकरण?
न्यायालयाने आज रामनिवास गोयल यांना ६ महिन्यांच्या तुरुंगवासाची शिक्षा ठोठावली. या प्रकरणाबाबत मिळालेल्या माहितीनुसार, दिल्ली विधानसभा निवडणुकीपूर्वी ६ फेब्रुवारी २०१५ रोजी स्थानिक बिल्डर मनीष घई यांच्या विवेक विहार येथील घरात गोयल यांनी आपल्या समर्थकांसह बळजबरीने प्रवेश केला होता. आपल्या घरात तोडफोड करण्यात आल्याचा आरोपही घई यांनी गोयल आणि त्यांच्या समर्थकांवर केला होता. याबाबत पोलीस ठाण्यात नोंदविण्यात आलेल्या तक्रारीनुसार, निवडणुकीपूर्वी घई यांनी लोकांना वाटण्यासाठी दारू, ब्लँकेट आणि इतर गोष्टी लपवून ठेवल्या होत्या असा आरोप गोयल यांनी केला केला होता. तर, आम आदमी पक्षाच्या नेत्यांनी आरोपाचे खंडन करत म्हटले होते की, त्या लोकांनी पोलीस नियंत्रण कक्षाशी (पीसीआर) दूरध्वनीवरून संपर्क साधल्यानंतर स्थानिक पोलीस ठाणे प्रभारी आणि सहाय्यक पोलीस आयुक्तांसोबत, तसेच पोलिसांच्या एका पथकासोबत घई यांच्या घरात गेले होते.