नायजेरिया: वृत्तसंस्था । नायजेरियातील बोको हराम या संघटनेच्या दहशतवाद्यांनी ४३ शेत मजुरांची निर्घुण हत्या केली आहे. उत्तर पूर्व नायजेरियातील मेदूगुरी शहरात ही घटना घडली. नायजेरिया राष्ट्रपतींनीही या हत्याकांडाचा निषेध केला आहे.
बोको हरामच्या दहशतवाद्यांनी या शेतमजुरांना रश्शीने बांधले आणि त्यानंतर त्यांचे गळे चिरले. हे शेत मजूर एका शेतात काम करत होते. बोको हरामने ४३ जणांना ठार केले, तर सहाजण जखमी झाले. या हल्ल्यापासून बचावलेल्या लोकांची मदत करणाऱ्या मिलिशियाचे नेते बाबाकुरा कोलो यांनी सांगितले की, घटनास्थळावरून आम्हाला ४३ जणांचे मृतदेह आढळले. या सर्वांची निर्घुण हत्या करण्यात आली असून सहा जण गंभीर जखमी आहेत. बोको हराम या भागात सक्रिय असून सातत्याने कामगारांवर हल्ला करत असल्याचे त्यांनी सांगितले.
नायजेरियाचे राष्ट्रपती मोहम्मद बुहारी यांनी या हल्ल्याचा निषेध केला आहे. हत्याकांडात ठार झालेले मजूर उत्तर पश्चिम नायजेरियातील सोकोतो राज्यातील असल्याची माहिती मिलिशिया इब्राहिम लेमन यांनी दिली.
मागील महिन्यात बोको हरामच्या दहशतवाद्यांनी दोन वेगवेगळ्या घटनेत मेदूगुरीजवळ २२ शेतकऱ्यांना ठार केले होते. बोको हरामने आपल्या हिंसक कारवाईत शेतकरी, मजूर, मच्छिमार यांना लक्ष्य केले आहे. बोको हरामने या लोकांवर हेरगिरी करणे, लष्कर आणि स्थानिक प्रशासनाला, मिलिशियांना माहिती पुरवणे आदी आरोप केले. वर्ष २००९ नंतर आतापर्यंत जवळपास ३६ हजारजणांना प्राण गमवावे लागले असून जवळपास दोन लाख लोकांनी स्थलांतर केले आहे.
आफ्रिका खंडातील नायजेरियामध्ये २००२ पासून बोको हराम या नावाने ही संघटना कार्यरत झाली. मात्र, त्यापूर्वीच म्हणजे १९९५ मध्ये मल्लम यावल या नायजेरियन तरुणाच्या नेतृत्वात काही मुस्लीम युवक शबाब या नावाने एकत्र आले होते. यावल बाहेर पडल्यानंतर युसूफ मोहंमद संघटनेचा म्होरक्या बनला. बोको हरामच्या स्थापनेला नायजेरियातील हौसा, फुलानी आणि काही अन्य जमातींमधील वांशिक संघर्षाचीही किनार आहे. शरीयाचे राज्य स्थापन करणे आणि नायजेरियाचे पाश्चात्यीकरण थांबवणे हे बोको हराम संघटनेचे मुख्य ध्येय आहे.
नायजेरियाच्या बोर्नो प्रांतातील मेदूगुरी गावात स्थापन झालेल्या या संघटनेचे प्रभावक्षेत्र गेल्या १२ वर्षात प्रचंड विस्तारले आहे. आज नायजेरियाच्या बोर्नो, अदामावा, कडूना, बाऊची, योब आणि कानो या प्रांतांबरोबरच चाड, कॅमरून आणि नायजेर हे देशही बोको हरामच्या कारवायांनी त्रस्त आहेत.
नायजेरियन भूमीला इस्लाममय करण्यासाठी ख्रिश्चन नागरिकांना ठार करणे आणि पाश्चिमात्य देशांना सहकार्य करणाऱ्या सरकारला विरोध करण्यासाठी सरकारी संपत्तीवर, अधिकाऱ्ंयावर हल्ले करून दहशत पसरविणे हे बोको हरामचे मुख्य काम आहे. बोको हराम हल्ल्यासांठी प्रामुख्याने बाइक्सचा वापर करत असल्याने उत्तर नायजेरियातील अनेक शहरांमध्ये बाइक्सवरच बंदी घालण्यात आली आहे.