नागपूर : वृत्तसंस्था । राज्य विधिमंडळाचे येत्या ७ डिसेंबरपासून होणारे हिवाळी अधिवेशन उपराजधानीत घेण्याऐवजी यावर खर्च होणारा निधी नागपूर-विदर्भात कोव्हिड उपचारासाठी, आरोग्ययंत्रणा बळकट करण्यासाठी द्यावा, अशी मागणी काँग्रेसचे शहराध्यक्ष आमदार विकास ठाकरे यांनी केली आहे.
मुख्यमंत्री उद्धव ठाकरे यांना पाठवलेल्या प्रदीर्घ पत्रात विकास ठाकरे यांनी तोकड्या आरोग्य यंत्रणेचे दाहक वास्तव मांडले आहे. गेल्यावर्षी ६ दिवसांच्या अधिवेशनावर ७५ कोटी रुपयांहून अधिक खर्च झाल्याचा अंदाज आहे. रोज १३ कोटी म्हणजे दर तासाला १ कोटी ६२ लाख आणि मिनिटाला २ लाख ७० हजार रुपये खर्च झाला. कोरोनामुळे आरोग्ययंत्रणा अपुरी पडली आहे. रुग्णालयातील खाटा, ऑक्सिजन आणि व्हेंटिलेटरचा अभाव आहे. मृत्यूचे प्रमाण वाढले. या स्थितीवर मात करण्यासाठी आरोग्य यंत्रणा सुसज्ज करणे अत्यावश्यक असल्याचे त्यांनी म्हटले आहे.
नागपुरात रोज दोन हजारांहून अधिक रुग्णांची भर पडत आहे. ६० हजारांहून अधिक रुग्ण असून सुमारे १ हजार ८१५ नागरिकांचे मृत्यू झाले. महापालिकेतील ३८५ कर्मचारी बाधित आहेत. १७ कर्मचाऱ्यांचा मृत्यू झाला. महापालिका आयुक्तांनी कोव्हिडबाबत घेतलेल्या निर्णयास खासगी रुग्णालयांनी उच्च न्यायालयात आव्हान दिले. रुग्णालयाचे शुल्क निर्धारित करण्याचा सरकारला अधिकार नसल्याचा दावा केला आहे. मेयो व मेडिकलमधील दीडशे डॉक्टर बाधित आहेत. महापालिकेकडे नोंद असलेल्या ६३७ खासगी रुग्णालयांपैकी ३३ मध्ये ४०७ आयसीयू व १२२ व्हेंटिलेटर आहेत. शहरात ही स्थिती असताना कोव्हिड सेंटर असलेले आमदार निवास व दीडशे कर्मचारी राहात असलेले १६० गाळे रिकामे करण्याचे आदेश सार्वजनिक बांधकाम विभागाने दिले आहे. दीडशे कर्मचाऱ्यांना अशा स्थितीत भाड्याने कुठे घर मिळणार, असा सवालही ठाकरे यांनी केला आहे.
सरकारी आदेशामुळे प्रशासनही हतबल आहे. अधिवेशनावरील कोट्यवधी रुपयांचा खर्च करण्याऐवजी नवीन रुग्णालय उभारता येईल. सद्यस्थितीत वैदर्भीय जनतेलाच अधिवेशन नको, याउलट गेल्या अधिवेशनात किती प्रश्न निकाली निघाले, असा संताप व्यक्त करण्यात येत असल्याकडेही विकास ठाकरे यांनी मुख्यमंत्र्यांचे लक्ष वेधले आहे.