नेपाळमध्ये कोरोनील वितरणावर स्थगिती

 

काठमांडू : वृत्तसंस्था ।  पतंजलीद्वारे निर्मित कोरोनिल किटच्या वितरणावर नेपाळ सरकारने बंदी घातली आहे. कोरोनिल औषध करोना विषाणूच्या संसर्गाविरोधात प्रभावी असल्याचा एकही ठोस पुरावा नसल्याचे नेपाळने म्हटले आहे.

 

नेपाळच्या आयुर्वेद आणि पर्यायी औषध विभागाने दिलेल्या आदेशानुसार कोरोनिलच्या १५०० किट खरेदी करण्यात योग्य प्रक्रियेचे पालन करण्यात आले नाही. त्यामुळेच कोरोनिलचे वितरण तात्काळ थांबविण्यात आले आहे. याआधी बाबा रामदेव यांनी भारतात कोरोनिल औषधामुळे कोरोना बरा झाल्याचा दावा केला होता. त्यानंतर देशात वाद निर्माण झाला. त्यानंतर रामदेव यांनी हे औषध रोगप्रतिकार शक्ती वाढवत असल्याचे म्हटले.

 

बाबा रामदेव यांनी नेपाळमध्ये कोरोनिलचे १५०० किट मोफत पाठवले होते. कोरोनिल किटमध्ये असलेले औषधे आणि नाकात दिले जाणारे तेल हे कोरोना विषाणूसोबत लढण्यासाठी प्रभावी नाही. इतर परदेशी औषधांच्याही बरोबरीचे नसल्याचे नेपाळ सरकारने म्हटले. मात्र, नेपाळमध्ये पतंजलीच्या उत्पादनांवर बंदी नसल्याचे आरोग्य मंत्रालयाने म्हटले. नेपाळ सरकारने कोरोनिलवर बंदी घालण्याबाबत कोणतेही आदेश सरकारने दिले नसल्याचे अधिकाऱ्यांनी म्हटले. इंडियन मेडिकल असोसिएनशनने कोरोनिलवर घेतलेल्या आक्षेपाची दखलही नेपाळने घेतली आहे.

 

भूतान नंतर कोरोनिलच्या वितरणावर बंदी घातलेला नेपाळ हा दुसरा देश आहे. अलीकडेच भूतान औषध नियामक प्राधिकरणाने या औषधाच्या वितरणावर बंदी घातली. अलीकडेच बाबा रामदेव यांनी अ‍ॅलोपॅथी औषधांना कचरा असल्याचे म्हटले होते, त्यानंतर इंडियन मेडिकल असोसिएशनने त्याला विरोध केला.

 

पतंजलीच्या नेपाळ कार्यालयाने सांगितले की, कोरोनिल किट अद्याप नेपाळमध्ये नोंदणीकृत झालेली नाही. त्यामुळे त्याची व्यावसायिक विक्री अथवा वितरण होऊ शकत नाही. नेपाळ सरकारला कोरोनिल किट भेट म्हणून देण्यात आले होते. आवश्यक इतर कायदेशीर प्रक्रिया सुरू करण्यात आली असल्याचे पतंजलीने म्हटले. नेपाळच्या आरोग्यमंत्र्यांना भेट म्हणून देण्यात आले होते आणि व्यावसायिक विक्री वितरणाच्या संदर्भात त्याकडे पाहता कामा नये असेही पंतजली नेपाळने स्पष्ट केले.

 

आम्हाला विविध सोशल मंचावर फॉलो करा

Comments are closed, but trackbacks and pingbacks are open.